Amaphoyisa aseLimpopo axwayisa ngokugcina izizumbulu zestokfela endlini kulandela ukubanjwa inkunzi abesifazane Amaphoyisa asekhiphe isixwayiso kwabezitokfela kulandela ukubanjwa inkunzi abesifazane baphucwa imali namaselula eLimpopo ngempelasonto. Lesi sigameko senzeke eMusiphana ngoMgqibelo ekuseni lapho abesifazane abangu-16 bebehlangene beqoqa imali yestokfela yokusonga unyaka. Amaphoyisa athi kuthiwa kungene endlini amadoda amathathu omunye ezimboze ubuso. “Abasolwa ababili bebehlome ngezibhamu bakhomba ngazo abesifazane base befuna imali. Abasolwa kuthiwa bathathe imali ngaphambi kokusesha abesifazane base bebabamba inkunzi enye imali abebeyiqoqe kwezinye izitokfela babaphuca namaselula,” kusho amaphoyisa. Athi abasolwa baqhumise isibhamu ngaphambi kokubaleka ngemoto ebomvu engenayo i-number plate okuthiwa ibishayelwa ngowesifazane. Imali ababanjwe yona inkunzi ilinganiselwa kuR30 000. Amaphoyisa athole amagobolondo ezinhlamvu endaweni yesigameko kwavulwa necala lokubamba inkunzi. Umkhuzi wamaphoyisa eLimpopo, uLieutenant Generall Jan Petrus Scheepers usigxekile lesi sigameko waxwayisa abezitokfela ngokugcina imali enkulu endlini. “Abezitokfela kumele babheke ezinye izindlela eziphephile njengokufaka ebhange imali yabo kunokugcina isamba esikhulu emakhaya lapho bengase behlaselwe khona yizigebengu. Sizoqhubeka nokuqinisa imizamo yokuqinisekisa ukuthi abenze lokhu bayatholakala futhi babhekana nengalo yomthetho,” kusho uScheepers. Amaphoyisa anxuse ukuthi onolwazi athinte umphenyi wecala uConstable Thabiso Makgamatha kuu-076 023 1981 noma ku-08600 10111
También lo cubren: Isolezwe.
Ver más en News Today